11 июл 2018

Водзмöстчысь, кывкутысь, пыдди пуктана


Эмöсь йöз, кодъяс олöм чöжыс сiйöс вöчöны, мед ми олiм майшасьтöг, а суас кö нин лёктор, пырысь-пыр локтöны отсöг вылö. Татшöмъяс лыдын Николай Павлович Расов, кодi öнi  веськöдлö республикаса биысь доръян службалöн Кулöмдiн районса 14-öд номера отрядöн.

1958-öд вося май 1-öд лунö Ручын чужлöм морт томдырйиыс, дерт, эз чайтлы, мый коркö босьтас ас вылас та ыджда кывкутöм. Дас öкмыс арöсöн Сыктывкарын 19-öд номера профтехучилище помалöм да водительöн лоöм бöрын босьтчис уджавны Озъягса лесопунктын. Тайö посёлокас бать-мамыс вуджлiсны сылöн чужöм бöрын регыд мысти да сэнi сэсся быдмис и велöдчис.

Во мысти босьтiсны армияö. Служитiс ракетнöй войскаясын Амурса обласьтын. Сыктывкарö воöм мысти кайны Эжва кузя Озъягöдз пуксис «Заря» вылö.

- Сэнi менö, салдат паськöма мортöс, казялöма Кулöмдiнö кайысь биысь видзчысьöм кузя юкöнса начальник Борис Юрьевич Сухоруков. Бура дыр кайигад сiйö менö «гöтралiс», - казьтыштiс ылi кольöм кадсö Николай Павлович.

1980 вося май помсянь уджалö юрсиктын. Асланыс котырын уджалiс 25 воысь дырджык, видзöдiс районын биöн вöдитчöм бöрся, велöдiс овны уджалысь котыръясöс и йöзöс видзчысьöмöн, быдмис начальникöс вежысьöдз. Тайö каднас ёна ыджыд öзйöмъяс, кöнi эськö сотчисны уна йöз, лоисны тöдчана воштöмъяс, эз вöвны.

2009-öд вося январ 1-öд лунсянь Николай Расов уджалö республикаса биысь видзчысян служба да войтырöс доръян  управлениеын 14-öд отрядса начальникöн. Тайö котырнас юрнуöдöмöн, Николай Павлович регыдöн сяммис котыртны биысь доръян часьтъяс да öтувтны найöс пöртны олöмö кывкутан могъяс. Коми республикаса 12 отряд пöвстысь 14-öд отряд медбуръясысь öти, волöн кывкöртöд серти сiйö унаысь нин вöлi медводдзаöн.

Николай Павловичлöн веськöдлöмöн лöсьöдöма биысь дорйысьяслы бура уджалöм могысь став позянлунсö. Сылöн водзмöстчöмöн кыпöдöма биысь дорйöм кузя депояс Великопольеын, Ручын, Немдiнын. Тайö сиктъясын лоисны би кусöдан часьтъяс. Депояс улö выльмöдiсны-лöсьöдiсны стрöйбаяс Керчомъяын, Тимшерын, Ягкöджын, Белоборскын, Озъягын. Налöн подув вылын лоисны би кусöдан торъя постъяс. 2016-2017-öд воясын Озъягса торъя постлöн подув вылын лöсьöдiсны став республикаса биысь дорйысьяслы велöдчанiн да ёнмöдчанiн, сiдз шусяна учебно-тренировочнöй база. 2017-öд воын танi нуöдiсны республикаса би кусöдысьяс пöвстын «Профессия серти медбур» ним вылö конкурс да уджкöд йитчöм спорт кузя ордйысьöм. Чукöртчылiс сёысь унджык морт. Куим туйвизь серти 14-öд отрядсаяс лоисны медводдзаöн.

Биысь доръян службаын уджалiгöн Николай Павлович петкöдлiс асьсö водзмöстчысь, кывкутысь да ставсö бура олöмö пöртысь мортöн да веськöдлысьöн. Уджалö ыджыд кöсйöмöн, оз артась кадöн. Сiйö ачыс быдтор вöчны сяммысь да йöзöс котыртны кужысь.

Кулöмдiнса Стрöитчысьяслöн улича вылын кыпöдiс ыджыд да кыпыд ас керка. Öта-мöднысö гöгöрвоöмöн олöны гöтырыскöд - Светлана Николаевнакöд, кодкöд чужтiсны-быдтiсны, велöдiсны да асшöр олöмö петкöдiсны куимöс, ставныс нин ас котыраöсь. Николай Павлович торйöдны позьтöм йитöда вöр-вакöд. Озъягын олiгöн вöдитiс весиг лэч туй. Öнöдз на медся радейтанаторйыс вöрö жö петалöм да медсясö - вотчöм.

Содтам, мый Николай Расовöс бур уджысь пасйöма «Россияса биысь видзан котырлы 360 во»,  Россияса МЧС-лöн «Маршал Василий Чуйков», «Коми республикалы 95 во» медальясöн, сiйöс аттьöавлiс республикаса Государственнöй Сöвет, сылы кольöм воын вичмöдiсны «Коми республикаысь биысь дорйöм кузя пыдди пуктана уджалысь» ним.

Тöлка-сяма мортöс  бур боксянь пасйис аслас кывбурын Кулöмдiнса гижысь  Василий Лодыгин. 

Би — шондi моз жö мортöс шонтысь,

Кор кöдзыд, йöжгылясям ми.

Эм весиг торъя пачьяс ломтысь,

Код кутö гортын мича би.

 

Но би и ыджыд воштöм вайö,

Кор сотчö керка, весиг морт.

Зэв ыджыд шог öд збыльысь тайö,

Кор синъяс водзад гу да горт.

 

Ог ылöсас ми некор олöй,

Да биысь дорйысь гöгöр эм,

Код пыр и чепöсйö, кор колö,

Мед миян шуда вöлi нэм.

 

И ыджыд аттьö шуам налы,

Код дорйö биысь лун и вой,

Код вöля сетö кöдзыд валы,

Мед шогыс миянöс эз сёй.

 

Дзик быдöн абу биö пырысь,

Öд сэнi вермö вошны юр.

И сиам талун нимкодьпырысь,

Мед ставыс аслас лоö бур.

 

"Парма гор" газетысь